بانتومايم؛ عامية مصرية؛ للشاعر/ ياسر عبد الحميد..جريدة الخبر_المصرية

 

الشاعر/ ياسر عبد الحميد.

بانتومايم _عامية مصرية.

.....................

تماثيل خشب بوشوش حطب

في مسرحيهَ ياللعجب!

و اللي كتبها كان ممثل بانتومايم

كان يومها نايم

و الصمت حل علي الوشوش

كان فن صامت جَسِد معاني

فضل يعاني عشان كتير ما بيفهموش

ما عرفش ايه أصل الحكاية

شاف الخيوط متعلقين وسط الهوا

بتشد أطراف العرايس

بيسلموا علي بعض فجأة اتكلموا

لكن الممثل اندهش صاحبه السكوت

ماقدرش يخرج منه صوت

جسد في حركات انفعاله

م اللي شافه راح يموت

جريوا العرائس الخشب جابوا التابوت

حطوه عليه فتح عنيه

و كأنه حلم مش دارى بيه

صرخ بصوته و قال لهم

انا روح و عايش في الجسد

و انتم عرايس من الخشب

قولولي ايه بس السبب

و ليه تحاربوا عشان اموت

ما سمعوهوش قال ده كابوس

و ابتدي يقطع كل الخيوط

شاف جسر موت من العرايس

و الحبال نازله عليه زي المطر

قال بس جايز البانتومايم كان السبب

يالا العجب ، شاف نفسه و هو بيحتضر

......................

شارك المقالة عبر:

إقرأ أيضا

اترك تعليقا: