يا بختك يا طير
يا بختك يا طير يا طاير في الهوا من غير قيود
لا فارق معاك أرض صحرا ولا بحر مهما كان واسع محدود
يا بختك يا طير يا عالي في السما بين النجوم
عينيك بتشوف أحلى منظر كل يوم
يا بختك يا طير يا طاير بين السُحُب
بتتنقل بينهم و كأنهم صفحات كُتُب
يا بختك يا طير يا عالي بتشم أنقى هوا
هوا اللي يشمه مايحتاجش لدوا
يا بختك يا طير يا اللي حتى ع الشجر
بتسمع سيمفونية من عصافير زمايلك مش بشر
يا بختك يا طير يا اللى لما تحب تبعد ف لحظة تسافر
مش لسة هتفكر وتقرر وتقعدلك حبّة تحاول وتعافر
يا بختك يا طير يا فارد جناحك في وش الرياح
لا أسد يقدر يطولك ولا تمساح
نفسي زيك أطير
وأطلع لفوق أوي كتير
وماشغلش بالي بمشاوير
والاقي في كل نسمة عبير
واهرب من أى وضع مرير
واتمتع بزقزقة العصافير
وارجع طفل والبس طراطير
واستمتع بحكاوي الاساطير
والعب مع الكل صغير وكبير
واما اتعب أنام ع الحرير
يا بختك يا طير يا طاير وحر
نفسي زيك اهرب من كل مُر
مش قاصد أحسدك يا طير أنا عارف إنك برضو بتعاني
ماحدش فينا سِلم، بس نصيحتي: اوعى توقف اغاني
اترك تعليقا:
